غلام اکبر مروت
د روغتیايي او امنیتي چارواکو د وینا لمخې ،د مې په ۱۲مه، د سرای نورنګ بازار ته څېرمه په یوه بمي چاودنه کې د مړو شمېر ۸ ته لوړ شوی او ۲۰ نور ټپیان دي. چارواکي وايي چاودنه په یو موټرسایکل کې د ځای پر ځای شویو چاودېدونکو توکو له امله رامنځته شوې ده.
د سیمي د پولیسو په وینا، دا پېښه هغه مهال رامنځته شوه چې په بازار کې د خلکو ګڼه ګوڼه زیاته وه او د ورځني کاروبار فعالیتونه روان وو. یو لوړپوړي پولیس چارواکي ویلي چې چاودېدونکي موادو ډک موټرسایکل د اورګاډي پټلۍ (پھاټک) ته نږدې وچاودېدل.
د چاودنې په مقام موجود د شال نیوز خبریال ،غلام اکبر مروت، وایي چې د چاودنې نه په نتیجه کې نږدې دکانونو او موټرو ته هم زیانونه ور اوښتي دي.
د ژغورنې ادارې، ریسکیو ۱۱۲۲ چارواکو لخوا، د پېښې له ځایه وړلی شوي ټپیانو کې د ځینو روغتیايي حالت د اندېښنې وړ بلل شوی دی. په سیمه ییزو روغتونونو کې بېړنی حالت اعلان شوی او ډاکټران د ټپیانو د درملنې په چارو بوخت دي.
د پولیسو مشر ،ډي ايي جي سجاد خان، وایي چې د پېښې وروسته پولیس سرتېرو سیمه په خپله ولکه کې اخیستې او د شواهدو راټولولو او پلټنو بهیر یې پېل کړی دی.
تر اوسه هېڅ کومې وسلوالې ډلې د دې برید مسوولیت نه دی منلی، خو په وروستیو میاشتو کې په لکي مروت، بنو او ډېره اسماعیل خان کې پر پولیسو او امنیتي ځواکونو بریدونه زیات شوي دي.
