د فیفا نړیوال جام ۲۰۲۶ د «جي» ګروپ په لومړۍ لوبه کې مصر او بلجیم په یو ـ یو ګول مساوي شول او دواړو لوبډلو یو ـ یو پواینټ ترلاسه کړ.

لوبه د امریکا د سیټل ښار په لومن فیلډ سټېډیم کې وشوه. مصر له پېله منظمه دفاعي لوبه وکړه او د چټکو جوابي بریدونو هڅه یې کوله. د لوبې په ۱۹مه دقیقه کې امام عاشور د مصر لپاره ګول وکړ او خپله لوبډله یې مخکې کړه.

له دې وروسته د بلجیم لوبډلې د بال واک ډېر درلود او د برابرونکي ګول لپاره یې پرله ‌پسې بریدونه کول، خو د مصر دفاعي کرښې د لومړۍ نیمایي تر پایه خپل برلاسی وساته.

په دویمه نیمایي کې بلجیم خپل بریدونه نور هم زیات کړل. د لوبې په ۶۶مه دقیقه کې روزونکي رومیلو لوکاکو میدان ته راووست. نوموړي له لوبې سره تر یو ځای کېدو لږ وروسته اغېز وښود.

د توماس میونیر له پاس وروسته د مصر مدافع محمد هاني د توپ په لرې کولو کې تېروتنه وکړه او توپ یې خپل ګول ته واچاوه. په دې سره بلجیم د لوبې په ۶۷مه دقیقه کې سیالي یو ـ یو برابره کړه.

د لوبې په پاتې وخت کې دواړو لوبډلو د بریا لپاره هڅې وکړې، خو هېڅ یوې ونه شو کولی دویم ګول ووهي. بلجیم په وروستیو دقیقو کې څو ښې موقعې هم ترلاسه کړې، خو د مصر دفاع او ګول ساتونکي یې مخه ونیوله.

مصر، چې تر ډېره د بریا په حال کې و، د خپل مدافع د تېروتنې له امله درې مهم پواینټونه له لاسه ورکړل. بلجیم بیا له ماتې ځان وژغوره او سیالي یې برابره کړه.

له دې پایلې وروسته مصر او بلجیم یو یو پواینټ لري او د «جي» ګروپ په راتلونکو لوبو کې به د بل پړاو ته د رسېدو لپاره خپلې هڅې روانې ساتي.