د پاکستان حکومت د بې اسنادو او د استوګنې د قانوني اسنادو له مودې وتلو افغان وګړو پر ضد عملیات نور هم چټک کړي دي. د چارواکو په وینا، په کراچۍ ښار کې پولیسو د بېلابېلو عملیاتو پر مهال ۳۸ افغان وګړي نیولي او د قانوني اسنادو تر ارزونې وروسته یې د لېږد ځانګړو مرکزونو ته استولي، څو د بېرته ستنولو قانوني بهیر بشپړ شي.

 

بلخوا، د بلوچستان د چمن ضلعي انتظامیې ویلي دي، چې په غیرقانوني توګه د مېشتو بهرنیو وګړو، په ځانګړي ډول افغانانو، پر ضد د روانو اقداماتو لړۍ دوام لري.

 

د ضلعي انتظامیې د معلوماتو له مخې، د چمن اسسټنټ کمشنر ،عزیزالله کاکړ، او تحصیلدار ،احمد خان، د جولایۍ په ۲مه، د ښار په بېلابېلو سیمو کې د روانو عملیاتو جاج واخیست او د پلټونکو ډلو د فعالیتونو څارنه یې وکړه.

 

چارواکو له خلکو غوښتي، چې هېڅ داسې بهرني وګړي ته، چې د اوسېدو قانوني اسناد نه لري، کور، دوکان یا د استوګنې او کاروبار لپاره بل ځای په کرایه ورنه کړي.

 

پاکستاني چارواکي وایي، د غیر قانوني بهرنیانو پر ضد عملیات به دوام ولري او هر هغه څوک چې د اوسېدو قانوني اسناد ونه لري، د هېواد د پرېښودو له بهیر سره به مخ شي.

 

د ملګرو ملتونو د کډوالو عالي کمېشنرۍ او د کډوالۍ نړیوال سازمان د معلوماتو له مخې، د ۲۰۲۳م کال د سپتمبر له نیمایي راهیسي له پاکستان څخه څه باندې شل لکه افغانان افغانستان ته ستانه شوي دي. په دغو کې یو شمېر کسان د حکومت د بېرته ستنولو د پروګرام له مخې ایستل شوي او نور په خپله خوښه هېواد ته تللي دي.

 

د ملګرو ملتونو د راپور له مخې، د ۲۰۲۵م کال په وروستیو او د ۲۰۲۶م کال په لومړیو میاشتو کې د افغانانو د نیولو او توقیف پېښې هم زیاتې شوې دي. راپور زیاتوي چې ډېرې نیونې په بلوچستان، اسلام‌اباد، خیبر پښتونخوا، پنجاب او سند کې شوې دي.

 

پاکستان د ۲۰۲۳م کال په وروستیو کې د غیر قانوني بهرنیانو د بېرته ستنولو پروګرام پېل کړ. په لومړي پړاو کې بې اسناده افغانان، وروسته د افغان تابعیت کارت لرونکي او ورپسې هغه افغانان هم د حکومتي پرېکړو تر اغېز لاندې راغلل چې د ثبت قانوني کارتونه یې لرل.

 

پاکستاني چارواکي وایي، دا اقدامات د هېواد د کډوالۍ د قوانینو د عملي کولو او امنیتي اندېښنو له امله ترسره کېږي. بلخوا د بشري حقونو نړیوالو ادارو د افغان کډوالو د نیولو، توقیف او جبري ستنولو په اړه اندېښنه څرګنده کړې او له پاکستانه یې غوښتي چې د نړیوالو بشري اصولو درناوی وکړي.

 

د ملګرو ملتونو د وروستیو شمېرو له مخې، لا هم شاوخوا ۱۴ لکه ثبت شوي افغان کډوال په پاکستان کې ژوند کوي، چې ډېر یې په خیبر پښتونخوا او بلوچستان کې مېشت دي.