مسقط/واشنګټن/تهران : امریکا او ایران د دویمې پرله‌ پسې ورځې لپاره پر یو بل پوځي بریدونه نه دي کړي، په داسې حال کې چې د عمان په منځګړیتوب ډیپلوماټیکې هڅې روانې دي، څو دواړه هېوادونه د اوربند د دوام او د خبرو مېز ته د بېرته ستنېدو پر لور وهڅول شي.

د امریکا په ملګرو ملتونو کې سفیر، مایک والټز، د جولایۍ په ۲۶مه، ویلي دي چې ولسمشر ډونلډ ټرمپ پوځي عملیات د دې لپاره ځنډولي چې ډیپلوماسۍ ته د پرمختګ فرصت برابر شي. هغه زیاته کړې ده چې که خبرې کومې پایلې ته ونه رسېږي، امریکا به خپل ټول پوځي انتخابونه پرانیستي وساتي.

په ورته وخت کې یوه لوړپوړي ایراني چارواکي ویلي دي، تر هغه چې امریکا نوي هوايي بریدونه نه وي پېل کړي، ایران به هم خپل غبرګوني بریدونه ونه کړي. د ایراني چارواکو په وینا، د دواړو هېوادونو ترمنځ د اوسني ارام وضعیت دوام د روانو ډیپلوماټیکو هڅو له پایلو سره تړلی دی.

د عمان په منځګړیتوب د دواړو لورو ترمنځ خبرې د هرمز تنګي له لارې د نړیوالو بار وړونکو بېړیو د خوندي تګ راتګ، د ایران د اټومي پروګرام او د لنډمهالي اوربند د دوام پر موضوعاتو متمرکزې دي.

د ایران د بهرنیو چارو وزارت ویاند اسماعیل بقایي ویلي دي، چې له عمان سره په خبرو کې یو لړ پرمختګ شوی او تخنیکي بحثونه روان دي، خو تر اوسه وروستۍ هوکړې ته نه دي رسېدلي.

سره له دې چې د دوو ورځو لپاره پوځي بریدونه درېدلي، خو لا هم د امریکا او ایران ترمنځ رسمي او دایمي اوربند نه دی اعلان شوی. امریکايي چارواکي وایي که ډیپلوماټیکې هڅې بې‌ پایلې شي، پوځي عملیات بیا پېل کېدی شي، او ایران هم خبرداری ورکړی دی چې په هغه صورت کې به خپل غبرګون له سره پېل کړي.

د بریدونو د درېدلو له امله د نړیوالو تېلو په بازار کې د بیو فشار یو څه کم شوی، خو د هرمز تنګي د امنیت او د سیمې د وضعیت په اړه اندېښنې لا هم پر خپل ځای دي. تر اوسه د امریکا او ایران ترمنځ دایمي سیاسي هوکړه نه ده شوې، او د دواړو هېوادونو راتلونکی دریځ به د روانو ډیپلوماټیکو خبرو له پایلو سره تړلی وي.