شانګله : د بلوچستان په کوټه کې ،د جولایۍ په ۳۰مه، د پي‌ اېم ‌ډي‌ سي علي بهايي سکرو کان پېښې د شانګلې په لسګونو کورونه د غم پر ټغر کښېنولي دي. په دې پېښه کې د شانګلې د الپوري تحصیل اړوند د بېلابېلو کلیو ۲۳ مزدورانو ژوند له لاسه ورکړی، چې په هغوي کې د یوې کورنۍ درې وروڼه هم شامل دي.

 

عبدالهادي، امجد علي او رحمت علي، درې واړه د ګل فروز زامن او د بانډه پیر اباد اوسېدونکي وو. دغه درې وروڼه د روزۍ ګټلو لپاره له خپل کلي څخه بلوچستان ته تللي وو، خو اوس یې مړي بېرته خپل کلي ته وړل کېږي.

 

د درې واړو وروڼو د مرګ خبر د هغوي په کورنۍ او ټوله سیمه کې د غم څپه خپره کړې ده. د کلي خلک وايي، د یوې کورنۍ د درې ځوانانو یوځای له لاسه ورکول داسې درد دی چې بیانول یې اسانه نه دي.

 

په مړو شویو کسانو کې د یوه کور دوه نور وروڼه، نجیب الله او نعیم الله د محمد سلیم زامن هم شامل دي. همداراز ایاز الدین او بحرالدین د ګل صنوبر زامن او حضرت علي او شبیرالله د عمر محمد زامنو هم په دې پېښه کې ژوند له لاسه ورکړی دی.

 

د پېښې ډېر قربانیان د پیر اباد، میاں کلي، انډۍ، بانډه، جوزو بانډه او شلمانو سیمو اوسېدونکي وو. هغوي د سختو اقتصادي حالاتو له امله د سکرو په کانونو کې د مزدورۍ لپاره بلوچستان ته تللي وو.

 

د ځايي خلکو په وینا، په شانګله کې د کار د مناسب فرصتونو د نشتوالي له امله زرګونه ځوانان د بلوچستان او د هېواد نورو برخو ته د سکرو په کانونو کې د کار لپاره ځي. دغه مزدوران ډېر وخت د ژوند له سختو خطرونو سره مخامخ وي، خو د خپلو کورنیو د اړتیاوو پوره کولو لپاره دا ستونزمن کار کوي.

 

د مړو شویو کسانو په نوملړ کې نجیب الله، نعیم الله، ذاکر الله، نصر الله، ایاز الدین، بحر الدین، محمد اسلم، حضرت علي، شبیر الله، رومان سعید، عمر سلیم، تاج بهادر، شین ګل، ابوذر، سفیان، عبدالهادي، امجد علي، رحمت علي، شین ګل، ودود الله، محمد علي، رحمان او ضیاءالله شامل دي.

 

د پېښې له خبر خپرېدو وروسته د شانګلې په الپوري او پیر اباد سیمو کې د ویر فضا خپره شوې ده. د قربانیانو خپلوان، د سیمې خلک او کلیوال د مړو د جنازو او تدفین لپاره تیاری نیسي.

 

په یوه ورځ د ۲۳ مزدورانو مرګ یوازې د ۲۳ کسانو له لاسه ورکول نه دي، بلکې د ۲۳ کورنیو د روزۍ سرچینې، هیلې او راتلونکی هم ورسره اغېزمن شوی دی. په ځانګړي ډول د ګل فروز کورنۍ، چې خپل درې زامن یې یوځای له لاسه ورکړي، له نه بیانېدونکي غم سره مخ ده.

 

د سیمې خلکو له حکومت څخه غوښتنه کړې ده چې د قربانیانو له کورنیو سره مالي مرسته وکړي، د سکرو کانونو د خوندیتوب لپاره عملي ګامونه واخلي او د شانګلې ځوانانو ته په خپله سیمه کې د کار زمینه برابره کړي، څو هغوي د روزۍ لپاره د مرګ له خطر سره مخ کانونو ته له تلو مجبور نه شي.