پېښور : د خیبر پښتونخوا اسمبلۍ غړو ،د اګست په ۶مه، په صوبه کې د خرابېدونکي امنیتي وضعیت په اړه جدي اندېښنه وښوده او له حکومته یې وغوښتل چې د ترهګرۍ پر ضد خپله تګلاره له منتخب استازو سره شریکه کړي.

د اسمبلۍ غونډه د سپیکر بابر سلیم سواتي په مشرۍ وشوه. د ډان د راپور له مخې، غړو وویل چې د وسله والو پر ضد په عملیاتو کې ولسي زیانونه د خلکو خپګان او بې‌ باوري زیاتوي او اغېزمنې کورنۍ د ریاست پر وړاندې دروي.

غړو ټینګار وکړ چې د امنیتي عملیاتو ترڅنګ باید د ولس د خوندیتوب، د خلکو د ستونزو او د زیانمنو کورنیو د مرستې لپاره هم روښانه تګلاره موجوده وي. هغوي غوښتنه وکړه چې د ترهګرۍ ضد پالیسي دې ولسي استازو ته وړاندې شي، څو پرې بحث وشي او د هغې د عملي کېدو په اړه وضاحت ورکړل شي.

د کور جوړونې صوبايي وزیر ،ډاکټر امجد علي، د سوات د کبل د اګست دویمې نېټې د ځانمرګي برید په اړه وویل چې دا په سیمه کې له تېرو ۱۱ کلونو وروسته لومړی ترهګریز برید و. د هغه په وینا، مشکوک بریدګر پخوا د جرم په یوه قضیه کې نیول شوی او محکوم شوی و، خو وروسته خوشی شو او افغانستان ته لاړ.

د شال نیوز د پېښې له ځایه د ترلاسه شوو معلوماتو له مخې، په دغه برید کې ۱۷ کسان وژل شوي او ۳۴ نور ژوبل شوي دي. چاودنه د کبل پولیس تاڼې ته څېرمه هغه مهال شوې وه چې په سیمه کې د سولې او پولیسو په ملاتړ غونډه روانه وه. د برید ذمه واري تحریک طالبان پاکستان منلې ده.

د اسمبلۍ غړو پوښتنه وکړه چې که د افغانستان پوله تړل شوې وي، نو وسله وال، پرمختللې وسلې او پوځي وسایل څنګه خیبر پښتونخوا ته داخلېږي. هغوي له حکومته وغوښتل چې د پولې د څارنې، د وسله والو د تګ راتګ او د امنیتي ادارو د همغږۍ په اړه تفصیلي وضاحت ورکړي.

د پاکستان پيپلز پارټۍ غړي ،احمد کریم کونډي، وویل چې وسله والو د صوبې ډېرې سیمې اغېزمنې کړې دي او حکومت باید د امنیت د ټینګښت لپاره عملي ګامونه واخلي. نوموړي وویل، چې که حکومت د امنیتي تګلارې د عملي کولو واک نه لري، نو باید ولس ته واضح وضاحت ورکړي.

د عوامي نېشنل ګوند غړي ،محمد نثار، هم وویل چې د صوبې د خرابېدونکي امنیتي وضعیت د مخنیوي لپاره باید وفاقي او صوبايي حکومتونه له امنیتي ادارو سره ګډه او څرګنده تګلاره جوړه کړي.

د بنو په اړه د اسمبلۍ غړي ،پښتون ‌یار، وویل چې د هغه په انتخابي حلقه کې په درېیو تحصیلونو کې د موبایل شبکو اوږد بندښت او د مهمو لارو تړل کېدو خلک له سختو ستونزو سره مخ کړي دي. هغه غوښتنه وکړه چې د امنیتي اقداماتو پر مهال دې د خلکو د تګ راتګ او ورځني ژوند د دوام لپاره بدیلې لارې برابرې شي.

په غونډه کې د کان‌ کیندونکو د خوندیتوب موضوع هم مطرح شوه. د کانونو د پرمختیا وزیر ،محمد عارف، وویل چې حکومت د کان کارګرانو لپاره د لازمي روزنې پروګرام جوړوي او د کان ته د داخلېدو لپاره به د روزنې تصدیق‌ پاڼه ضروري وي.

د شانګلې نه د اسمبلۍ غړي ،عبدالمنعم خان، بیا په بلوچستان کې د کان‌ کیندونکو د مرګ‌ ژوبلې په اړه اندېښنه وښوده او د مړو د لېږدولو پر کمزورو انتظاماتو یې نیوکه وکړه.

د اسمبلۍ غړو ټینګار وکړ چې په خیبر پښتونخوا کې د امن د ټینګښت لپاره یوازې امنیتي عملیات نه بلکې د ولس باور، سیاسي مشوره، د ادارو اغېزمنه همغږي او د ولسي زیانونو مخنیوی هم اړین دي.