لنډي کوتل : د پاکستان ویمن لیډرز پروګرام له مخې د خیبر په لنډي کوتل کې د ضلعې په کچه د اورینټېشن غونډه ،د اګست په ۸مه، د عبدالرازق شینواري په حجره کې وشوه. په غونډه کې د ښځو د پیاوړتیا، د مشرتابه وړتیاوو د لوړولو او په سیاسي او ولسي ژوند کې د هغوي د اغېزمن رول په اړه خبرې وشوې.

په دې ناسته کې د لنډي کوتل تحصیل چیئرمېن شاه خالد شینواري، عبدالرازق شینواري، عبدالوهاب، قامي مشرانو، سیاسي او ټولنیزو څېرو، د مدني ټولنې استازو او نورو اړوندو کسانو ګډون کړی و.

ګډونوالو ته د پروګرام د موخو، کاري ساحې، د ښځو د ټاکلو د طریقې او راتلونکو فعالیتونو په اړه تفصیلي معلومات ورکړل شول.

وویل شول چې پاکستان ویمن لیډرز پروګرام د ۲۰۲۶م کال په جولایۍ کې د ښځینه مشرانو د پیاوړتیا او د هغوي د مشرتابه د وړتیاوو د پراختیا لپاره پېل شوی دی. د دې پروګرام ملاتړ د ملګرو ملتونو د ښځو ادارې او د ملګرو ملتونو د پرمختیايي پروګرام له خوا کېږي، چې د ډیموکراټیکې زده ‌کړې او حساب ورکونې له ټرسټ سره په ګډه عملي کېږي.

د پروګرام له لارې به ښځو ته د مشرتابه، اړیکو جوړولو، ولسي ګډون او د ټولنې د ستونزو د اغېزمنې را برسېرولو په برخه کې عملي روزنه ورکول کېږي، څو په خپلو سیمو کې د مثبت بدلون لپاره اغېزمن غږ جوړ شي.

د منتظمینو په وینا، دغه پروګرام به په ۵۷ ضلعو کې تر ۱۷۰۰ زیاتې ښځې تر خپل پوښښ لاندې راولي، چې له ډلې به یې ۱۷۰ مخ پر ودې ښځینه مشرانو ته ځانګړې لارښوونه او د تجربه لرونکو مشرانو مشورې ورکول کېږي.

د ښځو د استازیتوب لپاره ټاکل شوې ده چې ۶۰ سلنه ګډونوالې له سیاسي ګوندونو، ۳۰ سلنه له مسلکي اتحادیو، د ښځو له سوداګریزو خونو، د وکیلانو له ټولنو او نورو اړوندو ادارو، او ۱۰ سلنه له نادولتي ادارو او ټولنیزو بنسټونو څخه وټاکل شي.

ویناوالو وویل، چې تر هغو چې ښځو ته په سیاسي او ټولنیز ډګر کې د پرمختګ فرصتونه ور نه کړل شي، په ټولنه کې تلپاتې مثبت بدلون ممکن نه دی. د دوي په وینا، په خیبر غوندې سیمو کې ښځو ته د مشرتابه فرصتونه ورکول به د هغوي باور زیات او د سیمه ‌ییزو ستونزو په حل کې به مرسته وکړي.

د پروګرام له مخې به په خیبر پښتونخوا او قبایلي ضلعو کې په ټاکل شویو سیمو کې د مشرتابه روزنیز کمپونه هم جوړېږي، چې ښځو ته به پکې د مشرتابه، ولسي ګډون، حق غوښتنې، اړیکو جوړولو او له ټولنې سره د اغېزمن تعامل په اړه عملي روزنه ورکول کېږي.

ګډونوالو وویل، چې د ضلعې په کچه دا اورینټېشن غونډه یوازې یوه تعارفي ناسته نه ده، بلکې د ښځینه مشرانو د پېژندلو، سیمه‌ ییزې همکارۍ او شراکتونو د پیاوړتیا او د ښځو لپاره د سیاسي او ولسي فعالیتونو د مناسب چاپېریال برابرولو په لور مهم ګام دی.