کابل : د افغانستان د هوا پېژندنې ادارې او د طبیعي پېښو پر وړاندې د چمتووالي ملي ادارې د وړاندوینو له مخې، په هرات، فراه، بادغیس، غور او فاریاب ولایتونو کې د سختو بارانونو، واورې او تندر احتمال ښودل شوی دی.

د اګست په ۱۰مه، د خپاره شوي خبرداري له مخې، په یادو سیمو کې د باران اندازه له ۵ تر ۳۰ ملي‌ مټرو او د واورې کچه له ۱ تر ۳۰ سانتي‌ مټرو پورې اټکل شوې ده. د طبیعي پېښو پر وړاندې د چمتووالي ملي ادارې له خلکو غوښتي دي چې د سیندونو، خوړونو او هغو سیمو له غاړو ځانونه لیرې وساتي چې د ناڅاپي سېلابونو له خطر سره مخ دي.

ادارې همداراز ویلي دي، چې خلک دې د ولایتونو د طبیعي پېښو پر وړاندې د مبارزې کمېټو سپارښتنې عملي کړي او د احتمالي زیانونو د مخنیوي لپاره دې لازم احتیاطي ګامونه واخلي.

موټرچلوونکو او مسافرو ته هم سپارښتنه شوې ده چې په غرنیو، واورینو او ښویېدونکو لارو کې له غیرضروري سفرونو ډډه وکړي.