د افغانستان د پېښو پر وړاندې د مبارزې ملي ادارې لوی رئیس، نورالدین ترابي، د مې په ۱۳مه، په کابل کې د افغانستان لپاره د ازبکستان سفیر، آیبک عثمانوف، او د دغه هېواد د سفارت له اقتصادي او سیاسي مرستیال سره وکتل، او د بشري مرستو او د طبیعي پېښو د مدیریت په اړه یې خبرې وکړې.
 

د پېښو پر وړاندې د مبارزې ادارې د خبرپاڼې له مخې، ترابي د ازبکستان پلاوي ته د ښه راغلاست ترڅنګ وویل چې افغانستان او ازبکستان د دیني، فرهنګي او جغرافیایي اړیکو له مخې نږدې هېوادونه دي او دوه اړخیزې اړیکې باید لا پیاوړې شي.
 

هغه د ازبکستان له لوري د افغانستان له خلکو سره د بشري مرستو مننه وکړه او زیاته یې کړه چې د اقلیمي بدلونونو له امله په افغانستان کې د طبیعي پېښو کچه لوړه شوې، او له همدې امله د زیانمنو شویو خلکو اړتیاوې هم زیاتې شوې دي.
 

ترابي وویل، د پېښو پر وړاندې د مبارزې ملي اداره د هېواد په کچه د پېښو د مدیریت مسؤله اداره ده او د مرستو ترلاسه کول، همغږي او په شفاف او منظم ډول د ۳۴ ولایتونو مستحقو کورنیو ته رسول یې له مهمو دندو څخه دي.
 

په دې کتنه کې د ازبکستان سفیر آیبک عثمانوف وویل چې افغانستان او ازبکستان نه یوازې ښه ګاونډیان، بلکې د سختو شرایطو شریکان هم دي. هغه ټینګار وکړ چې هېواد یې د اړتیا پر مهال د افغانستان له خلکو سره د بشري مرستو دوام ته ژمن دی.
 

عثمانوف زیاته کړه چې تاشکند د طبیعي پېښو او بشري بحرانونو پر مهال د همکاریو د پراخولو لپاره نوې لارې چارې ارزوي او چمتو دی چې له افغانستان سره خپلې مرستې لا زیاتې کړي.
 

د غونډې په پای کې دواړو لورو د دوستانه اړیکو، دوامداره بشري همکاریو او د ګډو پروګرامونو د پراختیا پر اهمیت ټینګار وکړ او یو بل ته یې یادګاري ډالۍ هم ورکړې.